Ald-skûtsjeskipper Joop Mink is freed nei in koart siikbêd ferstoarn. Hy wie tusken 1976 en 1987 skipper op It Doarp Grou. Mink is 87 jier wurden.Mink wûn yn syn perioade oan it helmhout by Grou acht wedstriden. Dêrneist stie hy noch tritich kear yn de top trije fan in deiútslach. Doe’t hy ophâlde moast as skipper gie hy fierder as adviseur fan syn âldste soan, Berend.
bron: omropfryslan.nl
De heit fan Mink, Berend Mink, waard twa kear kampioen mei Earnewâld. Aldste soan Berend pakte ek twa kear it kampioenskip. Hy die dat mei it Grouster skûtsje. De oare twa soannen, Jitze en Johannes, wiene beide ek aktyf as skipper yn ‘e SKS.
“SKS-famylje sil Joop Mink misse”
De foarsitter fan ‘e SKS, René Nagelhout, wist net dat Mink slim siik wie: “Seachst him wol elk jier âlder wurden”, sa seit Nagelhout, “want hy wie oeral altyd by. Hy folge de SKS noch op ‘e foet en wie altyd skerp. Hy hie ek altyd wol in miening oer de rinnende saken.”
Neffens Nagelhout wie Mink in moaie prater: “Hy hie ek humor en wie altyd yn foar in praatsje. De famylje Mink is fansels in grut ûnderdiel fan ‘e skiednis fan de SKS. Hy wie ek Lid van Verdienste fan de SKS. Ik wol ek graach myn meilibben mei de famylje útsprekke. De SKS-famylje sil Joop Mink misse.”
Ofskied yn skûtsjemuseum
Wa’t dat wol kin woansdeitejûn tusken 19.00 oere en 20.00 oere oere ôfskied nimme fan Joop Mink yn it skûtsjemuseum yn Earnewâld, sa lit soan Berend witte.